Y Nadolig yn Sir Gaerfyrddin

Caru Nadolig Lleol

Mae Sir Gâr yn nefoedd i rai sy’n mwynhau bwyd da; does dim byd tebyg i’r profiad o brynu cig o siop y cigydd, lle mae cynnyrch lleol a gwasanaeth personol yn cyfuno i sicrhau eich bod yn cael y bwyd gorau ar gyfer y Nadolig.

I gael profiad lleol go iawn, beth am ymweld â'n marchnadoedd? Mae gan Marchnad Caerfyrddin ac Farchnad Llanelli chymysgedd cyffrous o ddanteithion lleol. 

Mae Sir Gâr yn nefoedd i'r rhai sy'n mwynhau bwyd, gyda chynnyrch lleol eithriadol, cigyddion traddodiadol a masnachwyr annibynnol yn helpu i wneud y Nadolig yn un arbennig iawn. Gallwch bori'r stondinau sy'n llawn cigoedd lleol o safon, bwyd môr ffres, llysiau tymhorol, cawsiau artisan a danteithion Nadoligaidd, ochr yn ochr â detholiad deniadol o fwyd a diod wedi'u cynhyrchu'n lleol, sy'n berffaith ar gyfer anrhegion ystyriol a hamperi Nadoligaidd.

Syniadau siopa a danteithion blasus

Os ydych yn chwilio am rywbeth arbennig iawn ar gyfer y Nadolig, ewch i Wrights Food Emporium yn Llanarthne neu i siop Parc y Bocs yn Cydweli - dau le perffaith i brynu’r bwydydd lleol hynny sy’n hanfodol ar gyfer y Nadolig.

Mae Caws Cenarth hyd yn oed yn gwneud caws ar siâp pwdin Nadolig. Yn siop Heavenly, Llandeilo, mae pob math o siocled allwch chi ei ddychmygu, gan gynnwys Siôn Corn a dynion eira siocled a choed Nadolig siocled anferth, a byddwch yn siŵr o gael eich temtio!

Peidiwch â cholli Ham Caerfyrddin enwog Albert Rees, sef cynnyrch lleol a gaiff ei baratoi gan ddilyn rysáit draddodiadol sydd, yn ôl y sôn, yn dyddio'n ôl i gyfnod y Rhufeiniaid.

Edrychwch ar ein llwybrau cynnyrch lleol i gael rhagor o ysbrydoliaeth.

Syniadau ar gyfer Hamperi

Gall hamper bwyd wneud anrheg Nadolig berffaith - ac mae rhai moethus ar gael o siop Ferryman yn Nhalacharn, neu siop deli Blasus yng Nghaerfyrddin. Ymhellach i’r gogledd, mae La Patisserie yn Llanymddyfri, Pitch Fork and Provision yn Llandeilo ac Inn at the Sticks yn Llansteffan.

Beth am brynu hamper bwyd bach a mwynhau picnic yn y Gaeaf? Mae digonedd o leoliadau trawiadol i'w mwynhau.

Marchnadoedd Nadolig

Os ydych chi'n mwynhau digwyddiadau Nadoligaidd neu siopa Nadolig, cofiwch ddod i'n marchnadoedd dan do yng Nghaerfyrddin a Llanelli, sy'n gwerthu pob math o bethau gan gynnwys celf a chrefft, bwyd a diod lleol. Yn ogystal, mae marchnadoedd awyr agored wythnosol yng Nghaerfyrddin, Rhydaman a Llanelli.

Teithiau cerdded yn y gaeaf: traethau, mynyddoedd ac afonydd

Mae cannoedd o filltiroedd o lwybrau yn Sir Gaerfyrddin, a gallwch gerdded yn y wlad, o’r mynyddoedd i lawr i’r dyffrynnoedd ffrwythlon, neu ar lan y môr, yn cynnwys Llwybr yr Arfordir. Ymysg ein ffefrynnau ni y mae llwybr Dylan Thomas yn Nhalacharn; Parc Arfordirol y Mileniwm yn Llanelli; Gwarchodfa Adar Gwenffrwd-Dinas a choedwigoedd eang Brechfa a Chil-y-cwm.

Mynd ar sled os oes eira neu sglefrio ar iâ neu sgïo os nad oes eira!

Os bydd hi’n bwrw eira, mae llefydd gwych i sledio yn Sir Gaerfyrddin. Os na fydd yna eira, beth am fynd i sgïo ar lethr sych gwych Parc Gwledig Pen-bre?

Y Llethr Sgïo ym Mharc Gwledig Pen-bre yw un o'r nifer fach o lethrau sgïo sych sydd ar ôl yng Nghymru.

Ochr yn ochr â gwersi sgïo ac eirafyrddio, gall ymwelwyr fwynhau'r llethr tiwbio boblogaidd, gan gynnig taith wefreiddiol heb fod angen sgïo.

 
Nadolig Actif Amdani!

Mae mwy i'w fwynhau yn Actif y Nadolig hwn! Yn ogystal â Nofio am ddim i blant dan 16 oed, mae rhaglen lawn o weithgareddau ar gael, gyda digon o gyfleoedd i blant a theuluoedd fod yn egnïol, cael hwyl a manteisio i'r eithaf ar dymor yr ŵyl yn ein canolfannau hamdden ledled Sir Gaerfyrddin.

Ewch ar gefn eich beic!!

Beic newydd gan Siôn Corn? Gwisgwch ddillad twym ac ewch am ddiwrnod allan i'r teulu ar un o'n llwybrau beicio di-draffig yn Sir Gâr. Ewch ar hyd Llwybr Arfordir y Mileniwm, sydd â golygfeydd hyfryd o'r môr a digon o gyfleoedd i stopio am ddiod boeth, danteithion melys neu damaid blasus i'w fwyta ar hyd y ffordd. 

Neu ewch am dro ar lwybr heddychlon Dyffryn Tywi a llwybr Glan yr Afon Dyffryn Aman, lle mae llwybrau hawdd, cefn gwlad prydferth a chaffis croesawgar yn cynnig yr antur berffaith yn ystod y gaeaf. P'un a ydych chi'n chwilio am daith hamddenol i'r teulu neu gyfle i gael awyr iach ar ôl y Nadolig, mae gan Sir Gâr lwybr sy'n addas i bawb.

Cwrdd â charw go iawn

Ewch i weld ychydig o hud y gaeaf ym Mharc a Chastell Dinefwr, ger Llandeilo, lle mae bychod y danas yn crwydro'r parcdir hanesyddol. Ewch am dro gaeafol drwy'r ystâd ac wedi hynny, cynheswch gyda the a chacen gartref ym Mhlas Dinefwr neu ewch i Landeilo gerllaw, lle byddwch yn dod o hyd i ddewis ardderchog o gaffis, bwytai a siopau annibynnol clyd, sy'n ei gwneud yn ddiwrnod allan perffaith yn y gaeaf.

Ymweld â Siôn Corn

Ewch i Reilffordd Gwili i fynd ar daith hudolus ar drên Nadoligaidd drwy gefn gwlad Sir Gâr. Gyda goleuadau disglair, adloniant tymhorol ac ymweliadau arbennig gan Siôn Corn, mae'n brofiad y bydd y teulu cyfan yn ei fwynhau dros y Nadolig. I gael hyd yn oed rhagor o hwyl Nadoligaidd, ewch i ymweld â Rheilffordd Mynydd Mawr, neu beth am gael profiad Nadoligaidd gwirioneddol unigryw yng Nghanolfan Adar Ysglyfaethus Prydain, lle gallwch gwrdd â Siôn Corn, mwynhau arddangosfa hedfan Nadolig a chael golwg agos ar dylluan ac adar ysglyfaethus godidog.

Dewis eich coeden Nadolig

Bydd coed Nadolig Cowpots ar agor bob dydd o ddydd Sadwrn 28 Tachwedd a bydd detholiad o goed wedi'u torri ymlaen llaw. Neu ewch â'r teulu allan i ddewis eich coeden berffaith a mwynhau diod boeth a pizza wrth iddi gael ei thorri a'i lapio. Bydd y pizzeria ar agor ar benwythnosau o 12 canol dydd gan ddechrau ddydd Sadwrn 28 Tachwedd.

Ar ôl y Nadolig, gallwch fynd â’ch coeden i’w hailgylchu yn un o’n Canolfannau Ailgylchu Gwastraff y Cartref, yn Nant-y-caws, Caerfyrddin; Trostre, Llanelli, Wern-ddu, Rhydaman neu Hendy-gwyn ar Daf a casglwch fag o gompost am ddim am bob coeden Nadolig sy'n cael ei hailgylchu.

Mynd i weld pantomeim

Pa ffordd well o ddathlu'r Nadolig na mynd i weld pantomeim? Mae cynifer o sioeau i ddewis o'u plith y Nadolig hwn. Ewch i Theatrau Sir Gâr.

Awydd gwneud rhywbeth hollol wahanol?

Mae Cae Rasio Ffos Las yn Nhrimsaran yn cynnal eu Diwrnod Rasys Parti Nadolig blynyddol ar 17 Rhagfyr. Gydag wythnos yn unig i fynd tan y diwrnod mawr, cymerwch seibiant o'ch paratoadau Nadolig a mwynhewch ddiwrnod yn y rasys yn Ffos Las.

Lle ddechreuodd y cwbl...

Ar un adeg, roedd mynychu Gwasanaeth y Plygain o 3am-6am ar fore'r Nadolig yn un o'r prif draddodiadau Nadoligaidd yng Nghymru wledig yn yr 19eg ganrif. Felly, ar fore’r Nadolig, gallwch fynd i wasanaeth y plygain, un o hen draddodiadau’r ŵyl a ffordd hyfryd o dreulio un o foreau mwyaf hudolus y flwyddyn.

Yn Nyffryn Aman cynhelir gwasanaeth y plygain yn Hen Fethel, capel ar y mynydd ger y Garnant sy’n dyddio o’r 17eg ganrif. Bydd cannoedd o bobl yn mynd i’r gwasanaeth i ganu carolau yng ngolau cannwyll a gwrando ar eraill yn canu neu’n adrodd barddoniaeth. Bydd rhaid i chi adael eich car ym maes parcio Clwb Bowlio’r Garnant a cherdded dau gilometr i’r capel ar gyfer y gwasanaeth a fydd yn dechrau am 6.30 o’r gloch y bore. Cofiwch fynd â thortsh gyda chi.

Mae gwasanaethau crefyddol yn cael eu cynnal mewn nifer o lefydd eraill hefyd ar fore’r Nadolig. Cysylltwch â’ch eglwys neu eich capel lleol am fanylion.

Mari Lwyd

Mae'r Fari Lwyd yn draddodiad cyn-Gristnogol sydd yn ôl y sôn yn dod â lwc dda. Byddai penglog ceffyl yn cael ei haddurno â chlychau a rhubanau a'i gorchuddio â lliain gwyn cyn cael ei gosod ar ben polyn pren.

Mae defod y Fari Lwyd yn cael ei harfer o hyd mewn rhai ardaloedd yng Nghymru. Mae grŵp o blant ac oedolion yn mynd o dŷ i dŷ neu dafarn gan ganu neu adrodd barddoniaeth ar Nos Galan, ac maent yn cario'r Fari Lwyd. Mae ymweliad gan y Fari Lwyd yn dod â lwc dda ar gyfer y flwyddyn sydd i ddod. Gwnewch yn siŵr eich bod yn eu gwahodd a'ch bod yn rhoi rhodd o arian neu fwyd a diod iddynt (mae'r oedolion fel arfer yn gwerthfawrogi diod!)

Calennig

Yng Nghymru, ar ôl i'r cloc taro deuddeg a hebrwng y flwyddyn newydd i mewn, mae grwpiau o blant neu oedolion yn mynd o dŷ i dŷ ac o dafarn i dafarn yn canu, ac yn cael rhodd o arian neu ddanteithion Nadoligaidd am eu trafferth. Mae'r bechgyn â gwallt tywyll yn cael eu gwahodd i gerdded drwy'r tŷ, gan ddod â lwc dda ar gyfer y Flwyddyn Newydd. Os ydych yn eu clywed, gadewch iddynt ddod i mewn a'u gwobrwyo, i ddod â lwc dda ar gyfer y flwyddyn newydd!

Maent yn canu:

"Blwyddyn Newydd Dda i chi,
ac i bawb sydd yn y tŷ,
dyma yw’n dymuniad ni,
canu Blwyddyn Newydd Dda,
Blwyddyn Newydd Dda chi,
y flwyddyn orau, fu erioed,
o dyma hapus flwyddyn,
o dyma hapus flwyddyn,
o dyma hapus flwyddyn,
canu blwyddyn newydd dda"
Yna maent yn gweiddi "Blwyddyn Newydd Dda!"

Torchau Nadoligaidd

Pa ffordd well i baratoi ar gyfer y Nadolig na chreu eich addurniadau Nadolig naturiol eich hun? Mae nifer o leoedd i roi cynnig ar hyn.

Mwynhewch ychydig o oriau Nadoligaidd yn Llety Cynin i greu eich torch Nadolig hardd eich hun yn llawn aroglau pinwydd a gwyrddni. Mae'r pris yn cynnwys yr holl ddeunyddiau naturiol ynghyd â gwydraid o win twym a mins pei.

Ar 28 Tachwedd beth am wneud gweithdy creu torch Nadolig yn Aberglasne neu weithdy trefnu bwrdd Nadoligaidd yn yr Ardd Fotaneg ar 20 Rhagfyr? 

Byddwch yn greadigol yn Amgueddfa Wlân Cymru ar 12 Rhagfyr a gwnewch eich addurn Nadolig ffelt eich hun i fynd ag ef adref â chi.

Gwneud anrheg Nadolig

Mae dod o hyd i’r anrheg ddelfrydol yn mynd yn anoddach bob blwyddyn! Felly, beth am wneud eich anrhegion eich hun? Mae cyrsiau crochenwaith gwych yn cael eu cynnal gan Siramik, ger Caerfyrddin, lle gallwch ddysgu sut i greu anrheg unigryw, ac mae Ferric Fusion a Will Holland yn Phonix Forge yn cynnig cyrsiau ardderchog mewn gwaith gof. Rhowch gynnig arni, a synnu eich perthnasau gydag anrheg unigryw a phersonol.

Plant creadigol

Ar ddydd Sadwrn ym mis Tachwedd a mis Rhagfyr, beth am ymweld ag un o lyfrgelloedd Sir Gâr lle gallwch gael profiad o Argraffu 3D! Defnyddiwch eich sgiliau creadigol yn ystod y broses o gael cysyniad, dylunio ac argraffu!

Rhagor o Ddigwyddiadau'r Nadolig

Gweler ein tudalennau Be sy' Mlaen i gael gwybod rhagor am ddigwyddiadau'r Nadolig a Hwyl yr Ŵyl.

Dechrau cyfri'r dyddiau tan y Nadolig

Mae bron yn amser cynnau'r goleuadau Nadolig ar hyd a lled Sir Gâr. Mae gweld y goleuadau'n cael eu cynnau'n elfen hudolus o gyfnod y Nadolig ac yn gwneud i bawb deimlo hwyl yr ŵyl.

Mae Carnifal a Chynnau'r Goleuadau Nadolig yn Llanelli yn ddathliad mawr yn Sir Gâr ac mae miloedd o bobl yn mynd i'r digwyddiad er mwyn gwylio Gorymdaith y Nadolig a'r Arddangosfa Tân Gwyllt sy'n symbol bod dathliadau'r Nadolig wedi dechrau. Ymunwch yn yr hwyl nos Wener, 20 Tachwedd.

Ddydd Sadwrn, 21 Tachwedd, bydd goleuadau Nadolig tref Caerfyrddin a Rhodfa'r Santes Catrin yn cael eu cynnau.

Bydd digwyddiadau cynnau'r goleuadau Nadolig ym Mhorth Tywyn, Rhydaman a Llanymddyfri yn cael eu cynnal ar 27 Tachwedd.

Hwyl Nadoligaidd hudolus ym Mharc Gwledig Pen-bre

Mae Llwybr Goleuadau Hudolus Parc Gwledig Pen-bre yn ôl, a gorau oll, mae'r digwyddiad hollol AM DDIM (bydd angen talu am barcio i fynd i'r digwyddiad), felly dewch â'ch anwyliaid ac ymunwch â ni am brofiad hudolus yng nghoetiroedd rhyfeddol Pen-bre.  

Byddwch yn barod am y syrpréis arbennig o gwrdd â Siôn Corn yn ei gaban clyd yn y coetir! Mae brecwast gyda Siôn Corn ar gael hefyd! A gallwch hefyd fwynhau gwefr Tiwbio gyda'r Nos ar y llethrau. Mae angen archebu lle a thalu ffi ar gyfer y tri pheth.

Gwnewch yn siŵr eich bod yn dod â'ch camera a hwyl yr ŵyl! Mae croeso i gŵn sydd dan reolaeth ac ar dennyn.

Siopa - syniadau am anrhegion

Mae Ffair Nadolig Dinefwr eleni rhwng 20 a 22 Tachwedd yn cynnig digonedd o arddangoswyr, bwyd a chrefft lleol yng nghanol harddwch gaeafol Dinefwr. 

Mae cyfnod y Nadolig yn Sir Gâr yn baradwys i siopwyr, gyda digwyddiadau arbennig yn cynnig y cyfle i brofi rhywbeth gwahanol, ac rydych yn siŵr o ddod o hyd i bethau gwych ar gyfer yr hosan Nadolig.

Ewch i ysbryd yr ŵyl wrth i chi grwydro o gwmpas y stondinau o safon, gan gynnwys stondinau artistiaid annibynnol a gwneuthurwyr crefft yn Siopau Sionc Nadolig Marchnadoedd Sir Gâr sy'n cael eu cynnal yng nghanol trefi Caerfyrddin, Rhydaman a Llanelli drwy gydol mis Rhagfyr.

Bydd Ffair Aeaf Aberglasne yn dychwelyd ar 4, 5, 6 Rhagfyr. Bydd ymwelwyr yn dod ar draws digonedd o arddangoswyr, sef artistiaid, gwneuthurwyr, crefftwyr a dylunwyr. Gallwch dreulio diwrnod yn dod o hyd i anrhegion unigryw, addurniadau wedi'u gwneud â llaw, celf a nwyddau hardd i'r cartref.

Rhagor o Ddigwyddiadau Nadolig

Gallwch gael gwybod rhagor am ddigwyddiadau'r Nadolig a hwyl yr ŵyl ar ein tudalennau Be Sy' mlaen.